२७ फागुन, काठमाडौं । आगामी चैत पाँच गते हुने स्ववियु निर्वाचनको उम्मेदवारी मनोनयन दर्ता गर्ने समय सुरु हुने बेलासम्म नेपाल विद्यार्थी संघ (नेविसंघ)ले उम्मेदवार टुंगो लगाउन सकेको छैन ।

२७ फागुन (आज) ११ बजेदेखि २ बजेसम्मका लागि उम्मेदवार मनोनयनको समय निर्धारण गरिएको छ । पार्टीभित्रका समूह बीचमा सहमति नजुट्दा उम्मेदवार तय हुन नसकेको पार्टी तथा विद्यार्थी नेताहरुले जानकारी गराएका छन् । त्रिभुवन विश्वविद्यालय कीर्तिपुर सहित मुख्य गरी काठमाडौंका ठूला क्याम्पसहरुमा सहमति जुट्न सकेको छैन । त्रिचन्द्र, पद्मकन्या, शंकरदेव, नेपाल कमर्स क्याम्पस, मीनभवन लगायतमा पार्टीभित्रका दुबै समूह पक्षधरका विद्यार्थीको दाबी हुँदा सहमति जुट्न नसकेको हो ।

कांग्रेस सभापति शेरबहादुर देउवाले सहमहामन्त्री किशोरसिंह राठोर नेतृत्वको नेविसंघको निर्देशक समितिलाई उम्मेदवार चयनमा सहजीकरण गर्न निर्देशन दिएका छन् । देउवा पक्षबाट राठोरसहित प्रतिमा गौतम र राजीव ढुङ्गानाले सहजीकरण गरिरहेका छन् ।

संस्थापनइतरका नेता डा.शेखर कोइरालाले आफ्नो तर्फबाट समन्वय गर्न कोशीका पूर्वमुख्यमन्त्री केदार कार्कीलाई जिम्मेवारी दिएका छन् । निर्देशक समितिका सदस्य र कार्की बीच सोमबार र मंगलबार छलफल जारी छ । यद्यपि, नेताहरु टुंगोमा पुग्न सकेका छैनन् ।

केन्द्रीय सदस्य गौतमले उम्मेदवार टुंगाउनका लागि छलफल जारी रहेको बताइन् ।

विद्यार्थीहरुले आफैं सहमति गरेका ठाउँ बाहेकमा उम्मेदवार टुंग्याउन संवाद भइरहेको अर्का केन्द्रीय सदस्य ढुंगानाले जानकारी दिए । ‘उपत्यकाका मुख्य–मुख्य कलेज टुंगिएको छैन । १/२ घण्टा लाग्ला,’ ढुंगानाले अनलाइनखबरसँग भने, ‘जहाँ जुन व्यक्ति बलियो छ त्यसलाई उम्मेदवार बनाउने गरी छलफल भइरहेको छ । जित्नसक्नेलाई आधार बनाउन लागेका छौं ।’

प्रत्यक्ष र समानुपातिक दुवै तर्फको उम्मेदवारको मनोनयन दर्ताका लागि आज दिउँसो २ बजेसम्म समय छ । त्यसपछि दुवै तर्फका उम्मेदवारको नामावली पनि आजै प्रकाशित हुनेछ ।

दुवै तर्फको उम्मेदवारको नामावली उपर दाबी विरोध गर्ने दिन २८ फागुनका लागि तोकिएको छ । सोही दिन नै दुवै तर्फको दाबी विरोध उपर छानबिन गरी उम्मेदवारको नामावली प्रकाशित गर्ने कार्यतालिका छ ।

फागुन २९ गते उम्मेदवारको नाम फिर्ता लिने र अन्तिम नामावली सार्वजनिक गरिने छ । चैत ५ गते स्ववियु निर्वाच हुनेछ ।